PALAG MINDANAO mipalag sa EPIRA
2010-06-08

Mandato base sa Electric Power Industry Reform Act kon EPIRA Law nga nagmando sa pagbaligya sa gipanag-iyahan sa gobyernong National Power Corporation (NAPOCOR) ingon man ang Agus ug Pulangui Hydroelectric Plants gisupak sa grupong PALAG Mindanao kinsa milantaw nga ang pagahimoong privatization sa maong hydro power complexes moresulta lamang sa monopoliya sa elektrisidad diin pipila lamang ang makapahimulos niini ug dili na mapugngan ang pagsaka unya sa balayronon sa elektrisidad.
Base sa R.A. No. 9136, nga nailang EPIRA Law, gimando ang pagpribado sa mga kabtangan sa NAPOCOR aron pagpauswag sa kompetisyon sa kamerkadohan ingon man pagbaton og dugang kapital sa industriya sa elektrisidad. Lakip na niini ang pagbaligya sa Agus ug Pulangui Hydroelectric Plant complexes dinhi sa Mindanao human unya sa napulo ka tuig nga moratorium period niini nga matapos sa Hunyo 8, 2011.
Mibabag ang PALAG Mindanao sa maong mandato sa rason nga kini mapahimuslan lamang sa pipila ka indibidwal ilabi na ang pribadong grupo nga manag-iya na unya sa maong mga planta.
Matod pa, ang EPIRA wala makanunot sa maayong tumong niini tungod kay aduna’y posibilidad nga kini imonopoliya lang unya sa pipila nga manag-iya sa maong mga pasilidad nga moresulta sa dagkong power rates.
Sa usa ka manifesto, hugtanong giawhag sa PALAG Mindanao ang katawhan sa pagpakabana ug magpakisayod sa kahimtang sa elektrisidad nga makaapekto unya sa ilang panginabuhian.
Sa kasamtangan, nakita nga mas ubos ang power rates sa Mindanao kung ikumpara sa ubang bahin sa nasod ilabi na sa Metro Manila diin kasagan nagsalig na sa mga Independent Power Providers (IPPs). Kini tungod sa mas baratong hinguhaan sa elektrisidad nga nagsumikad sa hydroelectric power plants sama sa Agus ug Pulangui..
Ang PALAG Mindanao usa ka movement sa nagkahiusang civil society groups, people’s organizations, non-government organizations, mga kagamhanang lokal, electric cooperatives ug uban nga hugtanong misupak sa EPIRA dungan ang paghangyo sa pagbakwi o pagwagtang niini.
Sa umaabot Hunyo 8, 2010, adunay ipahigayon nga Kuryente Awareness Program ang PALAG Mindanao sa Maramag diin pagatukion ang kabahin sa kuryente nga matod pa, serbisyo og dili negosyo.
Usa ka caravan ang pagahimoon gikan sa syudad sa Malaybalay, Valencia hangtod na sa munisipalidad sa Damulog, Kibawe, Dangcagan, Don Carlos, Quezon ug Maramag diin ipahigayon ang programa.

Author: Veritas Bukidnon
Source: http://ja-jp.facebook.com/note.php?note_id=126094740755911
Date Published : 2010-06-08

---

View News Archives